22 April 2019
RSS Facebook Twitter   

අහා කොලරාඩෝව.....!

Grand Canyon Wissen Geograf අහා කොලරාඩෝව
උඹනම් හරිම ජගතෙක්

මේ මහා කැනියමේ
කට්ට කෛරාටික වෙට්ට පිත්තල
කාශ්ටක ගල්බොරලූ කඳුපිටින් ඉතිරිකර
පොඞ්ඩ බැරිවෙද්දි දියවෙන තරමටම හිත මොළොක්
ලාමක පස සෝද සෝදා
සංසාරගත ණය
මහමුහුදට ම පියවා
කැපූ කැටයමක රඟ.....!

උඹේ විරියෙන් හැඩවුණ,
උඹ නිසාවෙන් උසගිය
මේ තුඟු ගිරි කඳුරු පාමුල
අඳුරු පාතාලයක මිරිකී
වකගැසී ඇදී යන සඳ කෘෂ ව
ඉඳහිටක හෝ මෙනෙහි වන්නෙද

වසර මිලියන ගණනකට පෙර
උඹත් මේ උස ම උස කඳුමුදුන් හා සමව
අසම සම තැනිබිමෙක
මහා අවකාශයක නිම්වළලූ ඇද වැළඳ
උදාරම් ලෙස වැතිර හිටි බව?

උඹ ම සියොළඟ පිරිමැද
කපා සෝදා හැඩකර
තැනූ මේ නැඩ පරුවත
දෙන්නේද අද නුඹට
එකදු කෘතගුණ බැල්මක්
නෙතග සරදම් උදාරම් මිස?

එදා නුඹ ඇස’බිමුව නිදහසේ එලාලූ
අහස් ගඟ පවා අද මුවාකරලති උන්
මෝඩගල් කඳබඩින්.
නුඹට හිමි දැකුම් පතයද අද
ඒ යෝද කඳබඩ කලව පමණ ය.
වංගුවක් ගනිද්දී ඉඳහිටෙක
කලාතුරෙකින් දකින අහස්ගඟ
රේන්ද පටියකට වැඩියමක් වෙද
උන් තට්ටමක එල්ලෙන?

ඉඳහිටක ඇස රැඳෙන
ඉතා දුර රූපයකි අද නුඹට
මේ කැනියමේ මුවවිට
නුඹේ කැටයම් බලන්නට රැස්කන
මහා ජනගඟ

උහු ද නො දකිති
වසර මිලියන ගණන් වෙහෙසී
මේ මහා කැටයම නිමාකොට
ගැඹුරු පතුලක වැදී නිදනා නුඹ.
කැපූ කෙනෙකුන් නැතැයි සිතනා
මහා කැටයම මිස

අහා කොලරාඩෝව
නුඹ නම් හරි ම හපනෙක්
මෝඩගල් බඳු යෝද පරුවත
කපා ඔප ලා උස් කර
අඳුරු පාතාලයක වැද
උන් දෙපා වැඳ වැඳ
අපාගත සර්පයකු සේ
හොර හොරෙන්
ඇදී යන රඟ.....!

-සනත් බාලසූරිය

ඇමරිකා එක්සත් ජනපදයේ ඇරිසෝනා ප‍්‍රාන්තයේ පිහිටි මහා කැනියම (Grand Canyon) මහපොළොව මත කැපූ විසල් විස්මිත කැටයමකි. වසර මිලියන ගණනකට පෙර උස් තැනිබිමක් වැ තිබූ මෙහි, මේ මහා කැනියම කැටයම් කරන ලද්දේ, එ මැදින් අනාදිමත් කාලයක සිට ගලනා කොලරාඩෝ (Colorado) නදියෙහි දිය දහර නම් වැලිකරදාසිය විසිනැ’යි භූ විද්වද්හු සලකති.

 

 

සයිබර් පවුර